सुनसरीमा लकडाउन जेठ ३१ गते सम्म तरकारी पसल समेत वन्द रहने

छाल खवर
धरान,२२ जेठः जिल्ला प्रशासन कार्यालय सुनसरीले जेठ ३१ गते सम्म फेरि लकडाउन थप गरेको छ ।

कोरोना संक्रमणदर नघटेको भन्दै जिल्ला प्रशासन कार्यालय सुनसरीले जेठ ३१ गते राती १२ बजेसम्मको लागि निषेधाज्ञा थप गरेको हो ।

 

आज बसेको डिसिसिएमसीको बसेको बैठकले थप एक साताको लागि निषेधाज्ञा अवधि बढाउने निर्णय गरेको जिल्ला प्रशासन कार्यालय सुनसरीले जनाएको छ ।

जिल्ला प्रशासन कार्यालयले सर्वसाधारणहरूलाई पनि औषधी खरिद र उपचारबाहेक घरबाट बाहिर निस्कन नदिने निर्णय भएको कार्यालयले उल्लेख गरेको छ ।

कृर्षि तथा निर्माण मजदुरलाई स्वास्थ्य मापदण्ड पुरा गरेर आवतजावत गर्न दिने निर्णय भएको छ भने उद्योग तथा कलकारखानामा कार्यरत मजदुरहरूलाई बिहान ५ बजे देखि ७ बजेसम्म र बेलुकी पनि ५ देखि ७ बजेसम्म हिँड्न दिइने प्रशासनले जनाएको छ ।

तरकारी, फलफूल, डेरी तथा मासुजन्य पसल, हाट, गुद्री समेत पूर्ण रूपले बन्द गर्ने । औषधी पसल जस्ता अत्यावश्यक सेवाका व्यवसाय सञ्चालन गर्दा नेपाल सरकारले तोकेको स्वास्थ्य मापदण्डको पूर्ण रूपमा पालना गर्ने निर्णय भएको छ ।

सञ्चारकर्मी र पत्रकारको हकमा सूचना सङ्कलन तथा सम्प्रेषण गर्न सूचना विभाग वा सम्बन्धित सञ्चार गृहले जारी गरेको परिचय पत्रको आधारमा आवतजावत गर्न दिनेछ ।

विवाह तथा व्रतबन्ध आयोजनाका लागि ७ जना (दुलाहा दुलही सहित) भन्दा बढी नहुने गरी सहभागी हुन पाउने र उक्त कार्यका लागि पार्टी प्यालेस प्रयोग गर्न पाउने छैन ।