लिङथेप कल्याणकारी समितिको वंशावली विमोचन

छाल खवर
धरान,९ वैशाखः लिङथेप कल्याणकारी समिति मादी संखुवासभाको साङधुङ्गेहाङ सेरेङ लिङथेप लिम्बु वंशावली धरानमा मंगलवार विमोचन भएको छ ।

शनिवार धरान–८ स्थित लाङ्घाली सामुदायिक वनको सभा भवनमा सो विमोचन गरीएको हो ।

वंशावलीको विमोचन साङ्धुङ्गे सेरेङ सङ्जुम्भोका अध्यक्ष सेसेमी सेरेङ नाल्वोले गरेका थिए ।

कार्यक्रममा वंशावली प्रकाशनको लागि आर्थिक सहयोग गर्ने, सम्पादनमा रहेर सहयोग गर्ने लगायतका विभिन्न व्यक्तिहरुलाई सम्मान पत्रले सम्मान गरीएको थियो ।

सुवेदार तुलाराम सेरेङ लिङथेपको अध्यक्षतामा भएको सो कार्यक्रममा जय नारायण लिङथेप लगायतको उपस्थिति रहेको थियो ।

लिम्वु समुदाय भित्रको लिङथेप थरको पहिचान अस्तित्व र इतिहासको खोजी गर्नको लागि वंशावली प्रकाशन गरेको लेखक तथा सम्पादनका संयोजक उत्तम कुमार लिङथेपले वताउनु भयो ।

नेपालका विभिन्न जिल्लामा वसोवास गर्ने लिङथेपहरु २२० घर धुरीको संख्यामा रहेकोमा संखुवासभा नगरपालिकाको वडा नं ७,८ र ९मा बाक्लो रुपमा वसोवार रहेको वंशावली लेखक तथा सम्पादक उत्तम लिङथेपले जानकारी दिनुभयो ।

लिङथेपहरुको पहिलो संस्करण वंशावली भएकोले आधुनिक किसिमको (सोध विधिवाट) तथ्याङ्क तयार गरीनुका साथै लिङथेप वंशवाली भित्र हाडनाता नपरोस कुल कुटुम्व प्रष्ट होस भन्ने उदेश्यले छोरी चेली पट्टीको ज्वाईहरुको नाम थर र वंश समेत छुट्याईएको लिङथेपको भनाई रहेको छ ।

लिङथेपहरु संखुवासभा,धनकुटा,सुनसरी,मोरङ,झापा, इलाम र केही दार्जिलिङमा समेत वसोवास गरेको समितिको अध्ययनले देखाएको छ ।
कार्यक्रममा उदय तुक्वाहाम्फेले वंशावली संकलन र प्रकाशन आफैमा कठिन काम भएको वताए ।

कार्यक्रमको संचालन शशीकुमार लिङथेपले गर्नुभएको थियो भने इन्द्रमान लिङथेपले स्वागत मन्तव्य दिनुभएको थियो ।