बीपीमा मेडिकल अफिसरहरू आन्दोलित

छाल खवर
धरान,१८ असारः तलव वृद्धि भएको एकसाता पनि वित्न नपाउदै बीपी कोइराला स्वास्थ्य विज्ञान प्रतिष्ठान धरानमा कार्यरत मेडिकल अफिसरहरू फेरी आन्दोलित भएका छन् ।
प्रतिष्ठानको डेन्टल,कार्डियो,ग्यास्ट्रो, पल्मो, पेडियाट्रीक र इमेरजेन्सीमा काम गर्ने मेडिकल अफिसरहरू धर्नामा बसेका हुन् ।
मेडिकल अफिसरहरूले गएको आर्थिक वर्ष २०७६,०७७ मा सरकारको बजेट भाषण अनुसार सरकारी स्केलमा तलब पाउनुपर्ने माग गर्दे अहिले उनीहरूले उपकुलपतिको कार्यालय अगाडी धर्ना बसेका छन् ।
उनीहरुको सरकारी तलब स्केल ४५ हजार तोकिएको छ । तर प्रतिष्ठानले हाल कर कट्टा गरेर २९ हजार ४ सय रुपैयाँ मात्रै दिइँदै आएको छ ।
मेडिकल अफिसरहरू आन्दोलित भएर उपकुलपतिको कार्यालय अगाडी धर्नामा बसेपछि इमरजेन्सी, ग्यास्ट्रो, कार्डियो, पल्मो, पेडियाट्रीक, डेन्टल विभागमा मेडिकल अफिसरहरूको सेवा ठप्प रहेको थियो । एमडी पढ्ने जुनियर रेसिडेन्टहरुले मात्रै सेवा दिएका थिए । १० जना हुनुपर्नेमा २ जनाले मात्रै सेवा दिएका थिए ।
प्रतिष्ठान बाहेकका बीर,पाटन, टिचिङ अस्पताल लगायतका स्वास्थ्य संस्थाहरुले नेपाल सरकारले तोके अनुसार तलब दिइरहेकाछन् । माग पुरा नभएसम्म आफूहरूको आन्दोलन फिर्ता नहुने एक मेडिकल अफिसरले बताए । मागको सुनुवाई नभएसम्म काममा नफर्कने दावी समेत गरेकाछन् ।
केही दिन मात्रै २० प्रतिशत तलव वृद्धि गर्ने भन्दै प्रतिष्ठानले विज्ञप्ति निकालेको थियो ।