टोल टोलमा शिक्षक खटाएर विद्यार्थी पढाउने गाउपालिकाको निर्णय

छाल खवर
२५ असार, खोटाङ ः लकडाउनका कारण करिव चार महिनादेखि वन्द रहेको शैक्षिक संस्था साउन ७ गतेदेखि सञ्चालन हुने भएको छ ।
दिप्रुङ चुइचुम्मा गाउँपालिकाले आगामी साउन ७ गतेबाट टोलटोलमा शिक्षक परिचालन गरेर पठनपाठन सञ्चालन गर्ने भएको छ ।
कोरोना भाइरसको सङ्क्रमणका कारण सरकारले चार महिनादेखि शैक्षिक संस्था बन्द गराएपछि टोलटोलमा शिक्षक परिचालन गरेर नियमित पठनपाठन सञ्चालन गर्ने निर्णय मा गाउपालिका पुगेको हो ।
गाउपालिका अध्यक्ष भूपेन्द्र राईका अनुसार शहरी क्षेत्रमा सञ्चालन गरिएको अनलाइन कक्षा प्रभावकारी नदेखिएकाले आफ्नो क्षेत्रमा टोलटोलमा शिक्षक परिचालन गरेर पठनपाठन शुरु गर्न लागिएको हो ।
पहाडी क्षेत्रमा सवैको इन्टरनेटमा पहुँच नभएको र लामो समयको बन्दाबन्दीले विद्यार्थीमा पढ्ने बानी हट्दै गएकाले सामाजिक दूरी कायम गर्दै साउन ७ गतेबाट टोलटोलमा पठनपाठन शुरु गर्ने निर्णय गरिएको अध्यक्ष राईको भनाई रहेको छ ।
पठनपाठन गर्न र गराउनका लागि साउन ३ गते भित्र गाउपालिकाका अनिवार्य उपस्थित हुन समेत निर्देशन दिईएको समेत राईले जानकारी दिनुभएको छ । आफ्नो जिल्ला भदा बाहिर रहेका शिक्षकहरुलाई गाउँपालिकामा झिकाएर अनिवार्यरूपमा आरडिटी गरिने र आरडिटी रिर्पोट नेगेटिभ आएका शिक्षकलाई मात्र टोलटोलमा परिचालन गरेर पठनपाठन शुरु गर्ने निर्णय समेत गाउपालिकाले गरेको छ ।
तर गाउँपालिकाभित्रै रहेका शिक्षकको भने आरडिटी गर्नुपर्ने छैन । गाउँ शिक्षा समितिका सदस्य एवं महेन्द्रोददय माविका प्रधानाध्यापक केशवकुमार खड्काका अनुसार साउन ४ गते सबै शिक्षक आफू कार्यरत विद्यालयमा उपस्थित भई आ–आफ्नो विषयको कार्यतालिका बनाउनुका साथै साउन ७ गतेबाट टोलटोलमा पुगेर पठनपाठन शुरु गर्नुपर्नेछ ।
सो अवसरमा शिक्षकहरुले टोलटोलमा पुगेर विद्यार्थीलाई गृहकार्य गर्न लगाउने, नजानेका कुरामा सहजीकरण गर्ने, आन्तरिक मूल्याङ्कन अद्यावधिक लगायतका क्रियाकलाप गर्ने कार्य गर्नुपर्नेछ ।
शिक्षक र विद्यार्थीको सम्पर्कका माध्यमबाट विद्यार्थीमा परेको मनोवैज्ञानिक असर न्यूनीकरण गर्दै नियमित पठनपाठन सञ्चालन गर्न टोलटोलमा जाने निर्णय गाउपालिकाले गरेको हो ।
अध्यक्ष राईका अनुसार गाउँपालिकाभित्र सञ्चालित ४८ वटै सामुदायिक विद्यालयमा अध्ययनरत विद्यार्थीलाई टोलटोलमा भेला गरेर शिक्षक सिकाइका साथै विभिन्न क्रियाकलापमा सहभागी गराएर पढ्ने बानीको विकास गरिनेछ । सात वटा वडामात्रै रहेको उक्त गाउँपालिकाका सबै विद्यालयमा अध्ययनरत विद्यार्थीलाई यसअघि नै निःशुल्करुपमा पाठ्यपुस्तक उपलब्ध गराइएको थियो ।
टोलटोलमा परिचालन हुने शिक्षकले अनिवार्यरूपमा मास्क, ग्लोब्स र स्यानिटाइजर प्रयोग गर्नुपर्ने नियम बनाइएको छ । विद्यार्थीको गाउँटोलमै सञ्चालन हुने शैक्षिक क्रियाकलापका लागि २५० जना शिक्षक परिचालन गरिने गाउँपालिकाले जनाएको छ ।
जिल्लाका अन्य स्थानीय तहमा भने अहिलेसम्म कुन उपाय अपनाएर पठनपाठन सञ्चालन गर्ने भन्नेमा कुनै टुङ्गो लागेको छैन । दश स्थानीय तह रहेको जिल्लामा ४९३ सामुदायिक विद्यालय सञ्चालनमा छन् ।
यस विषयमा विद्यालय व्यवस्थापन समिति र अभिभावक समेतले सर्मथन जनाएकाछन् ।