साउन ८ गतेदेखि छोटो र लामो दूरीका यातायात चल्ने

रिपोर्टर नेपाल
काठमाडौं । लामो समयदेखि बन्द रहेका सार्वजनिक यातायात साउन ८ गतेदेखि सञ्चालन हुने भएका छन् ।

यातायात व्यवसायीहरुले बिहीबारदेखि स्थानीय, छोटो र मध्यम र लामो गरी चारै रुटमा यातायात सञ्चालन गर्ने निर्णय गरेका हुन् ।

मंगलबार नेपाल यातायात व्यवसायी राष्ट्रिय महासंघ र यातायात मजदुरको ट्रेड युनियनले संयुक्त पत्रकार सम्मेलन गर्दै साउन ८ गतेदेखि सार्वजनिक यातायात सञ्चालन गर्ने घोषणा गरेको हो ।

महासंघले आफू आबद्ध सबै यातायात कम्पनी, प्रा।लि, व्यवसायी तथा स्वरोजगार मजदुरलाई यातायात सञ्चालन गर्न आह्वान गरेको पत्रकार सम्मेलनमा जानकारी दिइएको थियो ।

गत चैत ११ गतेदेखि सरकारले गरेको लकडाउनका कारण सार्वजनिक यातायातहरु ठप्प बनेका थिए । सरकारले जारी लकडाउन केही खुकुलो बनाउँदै असार २६ गतेदेखि नै काठमाडौं उपत्यकाभित्र र अन्य ठाउँमा सम्बन्धित जिल्लाभित्र सार्वजनिक यातायात सञ्चालन गर्ने निर्णय गरेको थियो । तर, व्यवसायीले विभिन्‍न माग राख्दै यातायात सञ्चालन गर्न आनाकानी गरेका थिए ।

यातायात व्यवसायीको घोषित कार्यक्रमअनुसार साउन ८ गतेदेखि सम्बन्धित जिल्लाभित्र सार्वजनिक यातायात खुल्ने भएका हुन् । सरकारले छोटो दूरीका सवारीसाधन मात्र चलाउने निर्णय गरे पनि यातायात व्यवसायीले लामो दूरीका सवारी पनि चलाउने निर्णय गरेका हुन्।
रिपोटर नेपाल डटकमबाट