सर्दु र खर्दुको खानेपानी मुहानमा तोडफोड पाइप मात्र खुस्काइएको हो तोडफोड होइन– साम्पाङ

छाल खवर
धरान,१९ साउनः धरानको खानेपानीमा लामो समयदेखि विवाद हुदै आएको छ । कहिले तालावन्दी ,कहिले नारावाजी हुने गरेकोमा अहिले भने तोडफोड र पाइपलाइन छुटाउने काम समेत भएको छ ।

खानेपानी आयोजनामा भ्रष्ट्राचार भएको भन्दै आयोजनाको विरोध गर्दै आएका हर्क साम्पाङको नेतृत्वमा खानेपानी संस्थानका प्रमुख रामकुमार श्रेष्ठ समेतको टोलीले तोडफोड गरेको प्रत्यक्षदर्शीले वताएकाछन् ।

नेपाल खानेपानी संस्थान धरानका शाखा प्रमुख रामकुमार श्रेष्ठ समेतको उपस्थितिमा धरान–१३ फुस्रे सिस्टममा आउने सर्दु र खर्दुको मुहानमा बन्दै गरेको इन्टेकमा बिछ्याइएको पाइपलाइन तोडफोड गरेको थियो ।

खानेपानी आयोजनाका प्रमुख राजु पोख्रेलले धरान १३ फुस्रेमा बनेको खानेपानी फिल्टर प्लान्टमा ल्याउनका लागि बनाइएको सर्दुको इन्टेक र खर्दुको सेडिमेन्टेन्सन टङ्कीबाट आएको पाइपमा सो समूहले आइतवार क्षति पुर्‍याएको जनाएकाछन् ।

पोख्रेलका अनुसार सर्दुको इन्टेक र खर्दुको सेडिमेन्टेन्सन टङ्कीबाट फिल्टर प्लान्टमा ल्याउन जडान गरिएको पाइप तोडफोड गरी फुटाइएको छ भने अहिले फिल्टर प्लान्टमा पानी आउन पुरै बन्द भएको छ ।

धरान १३ को फुस्रेमा बनेको धरान खानेपानी आयोजनाको फिल्टर प्लान्टमा पानी ल्याउनका लागि बन्दै गरेको इन्टेक र पाइपमा धरान खानेपानी संस्थानका प्रमुख रामकुमार श्रेष्ठको अगुवाइमा पुगेका हर्क साम्पाङ, कृष्ण गौतम, मदन राई लगायतको २५,३० जनाको समूहले तोडफोड गर्नुका साथै पाइप समेत खुस्काई दिएको थियो ।

सो विषयमा हर्क साम्पाङले आयोजनाले खानेपानी संस्थानको पाइप जडान गरेकोले सो पाइप लाइन खुस्काइ मात्र दिएको दावी गर्दै तोडफोड नगरेको जिकिर गरेकाछन् ।

यता खानेपानी संस्थान धरानका प्रमुख रामकुमार श्रेष्ठले साम्पाङको टोलीले आफू लाई आयोजना हेर्नको लागि अनुरोध गरेकोले गएको मात्र वताउदै तोडफोडमा आफू संलग्न नरहेको दावी गरेकाछन् ।

इलाका प्रहरी कार्यालय धरानका प्रमुख डिएसपी ज्ञानेन्द्र बस्नेतले घटनाको वारेमा अध्ययन गरी मुचुल्का उठाएर आएको र अव कार्वाही प्रकृया अघि वढाउने जानकारी दिए ।

तोडफोडबाट करिब डेढ लाख बरावरको क्षति भएको प्रमुख खानेपानी आयोजनाका प्रमुख पोख्रेलले जानकारी दिएकाछन् ।

धरान खानेपानी संस्थानलाई,धरान खानेपानी वोर्डमा ल्याउनका लागि नगरप्रमुख तिलक राईको नेतृत्वमा टोली मन्त्रालय गएर आएपनि ठोस काम भने हुन सकेको छैन ।

संस्थानको सम्पत्ति, दायित्व र जिम्मेवारी बोर्डमा हस्तान्तरण गर्ने विषयमा संस्थान र बोर्डबिच शुरुदेखि नै विवाद हुँदै आएको छ ।

आयोजना र संस्थानवीचको विवादका कारण वर्षादको समयमा पनि खानेपानीको समस्या कायमै रहेको छ ।पछिल्लो समय धरानमा खानेपानीको समस्या यथावत हुन थालेपछि पछिल्ला दिनहरुमा धरानबाट अन्यन्त्र बसाई सर्न थालेकाछन् ।