नेशनल एकेडेमीको वार्षिक समारोह सम्पन्न

छाल खवर
धरान, २७ चैत्रः नेशनल एकेडेमी धरान–२ ले आइतबार आफ्नो वार्षिक समारोह सम्पन्न गरेको छ ।

विद्यालयमा आयोजित समारोहमा विद्यार्थीहरुका विभिन्न प्रस्तुतिसँगै पुरस्कार वितरण गरिएको थियो । शैक्षिक वर्ष ०७९ मा आयोजित खेलकुद सप्ताहका विभिन्न खेलमा विजेता खेलाडी विद्यार्थीहरुलाई सो अवसरमा पुरस्कार वितरण गरिएको थियो ।

खेलकुद सप्ताह अन्तर्गत मन्टेश्सरी तहका विद्यार्थीहरुलाई म्युजिकल चेयर, इन आउट, चकलेट रेस, इलेमेन्टरी तहका विद्यार्थीहरुलाई रिले रेस, हाजिरी जवाफ, स्पेलिङ, चित्रकला, भ्यागुता उफ्राइ र सेकेन्डरी तहका विद्यार्थीहरुलाई फुुटबल, भलिबल, ब्याडमिन्टन आदी खेलहरु आयोजना गरिएको थियो ।

समारोहमा यस शैक्षिक वर्षमा मन्टेसरी तहबाट सर्वोत्कृष्ट घोषित विद्यार्थी ओसन राई, इलेमेन्टरीबाट सर्वोत्कृष्ट गुन्जन लिम्बु र सेकन्डरी तहबाट सर्वोत्कृष्ट शिभम झालाई पुरस्कृत गरिएको थियो ।

यस शैक्षिक वर्षमा विद्यार्थीहरु मध्ये सबैभन्दा बढि अंक ल्याई स्कुल प्रथम हुने विद्यार्थी कक्षा ४ कि गुन्जन लिम्बुलाई समेत पुरस्कृत गरियो ।

विद्यालयले प्रत्येक वर्ष अभिभावकहरु मध्येबाट उत्कृष्ट एक अभिभावकलाई गार्जेन अफ द इयर अवार्डबाट सम्मानित गर्दै आएको छ ।

यसवर्ष सो अवार्ड कक्षा ४ विद्यार्थी लिच्छविहाङ राईका अभिभावक आरती राईलाई प्रदान गरिएको थियो ।

त्यसैगरी विद्यालयको टिचर अफ द इयर अवार्ड भाइस प्रिन्सिपल समेत रहनुभएकी ममता लिम्बु र स्टाफ अफ द इयरको अवार्ड एकाउन्टेन्ट मन्जु लिम्बुलाई प्रदान गरिएको थियो ।

सो अवसरमा विद्यालयमा डान्स, मोडलिङ र उसुमा नियमित स्रोत व्यक्तिको रुपमा कार्यरत क्रमशः मनिषा लिम्बु, मेरिना तुम्सा लिम्बु र रोहित लिम्बुलाई पनि सम्मान –पत्र प्रदान गरिएको थियो ।

नेशनल एकेडेमी प्रदेश नं. १ कै एकमात्र र पहिलो आइएसओ प्रमाण चिन्ह प्राप्त शिक्षण संस्था हो । यहाँ विद्यार्थीहरुको पठनपाठन नयाँ र फरक ढंगले गर्ने गरिएको छ ।

विद्यार्थीहरुलाई पुस्तकको ज्ञान गतिविधिहरु मार्फत दिइने शैली अवलम्बन गरिएको प्रिन्सिपल श्रीशीशा राईले बताए ।
शैक्षिक वर्ष २०८० का लागि भर्ना शुरु भइसकेको र सहुलियत दरमा शुल्क तोकिएको समेत जानकारी दिए ।