एमाले धरान कार्यालयमा तोडफोड गर्नेहरूलाई कारबाहीको माग

छाल खवर
धरान,३० भाद्रः भदौ २४ गते जेनजी आन्दोलनको आवरणमा भएको आगजनी र तोडफोड घटनामा संलग्नलाई कार्वाही गर्न नेपाल कम्युनिस्ट पार्टी (एमाले) धरान उपमहानगर कमिटीले तत्काल कानुनी कारबाही गर्न माग गरेको छ ।

धरान उपमहानगर कमिटीले सोमबार विज्ञप्ति जारी गर्दै कार्यालयमा सुनियोजित रुपमा पार्टी कार्यालयमा तोडफोड गर्नेलाई तत्काल कानूनी दायरामा ल्याउन माग गरेको हो ।

शान्तिपूर्ण आन्दोलनकारीको आवरणमा पार्टी कमजोर पार्ने उद्देश्यले योजनाबद्ध रूपमा कार्यालयमा आक्रमण गरिएको आरोप विज्ञप्तिमा लगाईको छ ।

विज्ञप्तिमा आगजनी, तोडफोड र अराजक गतिविधिमा संलग्न व्यक्तिहरूको पहिचान गरी कानुनी कारबाहीको माग गरिएको छ।

धरान नगर अध्यक्ष हर्कजंग एभेङ्गद्धारा जारी विज्ञप्तिमा घटनामा धरानका पत्रकार विमल शाक्य, मिलन वान्तवा र दीपेन्द्र राई (कान्छी) लगायतको नाम सार्वजनिक गर्दै उनीहरू घटनामा प्रत्यक्ष संलग्न रहेको पुष्टि भएको दाबी गरिएको छ। पार्टीले उनीहरूलाई तत्काल पक्राउ गरी कानुनी कारबाही गर्न सम्बन्धित निकायलाई आग्रह समेत गरेको छ ।

धरानको भाटभटेनी र नेताहरूको घरमा आगजनी गरिएको घटनाको तीव्र भर्त्सना गर्दै पीडितहरूलाई क्षतिपूर्ति दिलाउन सरकारसँग माग गरेको छ।

पार्टीले तोडफोड र आगजनीका घटनालाई कानुनी कारबाहीद्वारा रोक्नुपर्नेमा जोड दिएको छ।

पार्टीका सम्पूर्ण नेता, कार्यकर्ता, शुभेच्छुक र लोकतान्त्रिक नागरिकलाई यस्तो प्रतिगामी गतिविधिको विरुद्ध एकजुट भई विरोध गर्न र कानुनी शासन कायम गर्न दबाब सिर्जना गर्न विज्ञप्तिमा अनुरोध गरीएको छ ।